خان بیلہ میں جیولرز کی دکان پر بڑی چوری: 3 کروڑ سے زائد کا نقصان

 لیاقت پور (تحصیل رپورٹر محمد امجد خان ڈاہر عظیم پور)

خان بیلہ: تھانہ شیدانی کی حدود میں چوری کی بڑی واردات۔ نامعلوم چور خان بیلہ شہر سے جیولرز کی دکان سے 125 تولہ سونا، 60 تولہ چاندی اور 22 لاکھ روپے کیش لے اڑے۔ اطلاع ملتے ہی پولیس موقع پر پہنچ گئی اور تحقیقات شروع کردی گئیں۔

لیاقت پور تھانہ شیدانی کی حدود میں خان بیلہ شہر میں چوری کی بڑی واردات، نامعلوم چوروں نے سیف الماریوں کے تالے اور الماری کاٹ کر 125 تولہ سونا، 60 تولہ چاندی اور دکان میں رکھا 22 لاکھ کیش لے اڑے۔ اطلاع ملتے ہی پولیس موقع پر پہنچ گئی۔ تحقیقات شروع کردی گئیں۔ دکاندار نے تھانہ شیدانی میں تحریری درخواست دے دی۔ پولیس تحقیقات میں مصروف ہے۔ دکاندار کے مطابق 3 کروڑ 52 لاکھ 7 ہزار روپے کا سامان اور 22 لاکھ روپے نقدی نامعلوم لے اڑے ہیں۔

چوری کی اس واردات نے پورے علاقے میں خوف و ہراس کی فضا پیدا کردی ہے۔ مقامی لوگوں نے پولیس کی کارکردگی پر سوالات اٹھاتے ہوئے واردات میں ملوث افراد کو جلد گرفتار کرنے کا مطالبہ کیا ہے۔ دکاندار کے مطابق یہ واردات انتہائی منصوبہ بندی کے تحت کی گئی ہے، جس میں چوروں نے دکان کے اہم حصوں کی مکمل معلومات رکھتے ہوئے کارروائی کی۔

پولیس کے مطابق واردات کی جگہ سے شواہد اکٹھے کیے جا رہے ہیں اور قریبی سی سی ٹی وی کیمروں کی مدد سے چوروں کی شناخت کرنے کی کوشش کی جا رہی ہے۔ علاقہ مکینوں نے حکومت اور پولیس سے درخواست کی ہے کہ علاقے میں بڑھتے ہوئے جرائم کی روک تھام کے لیے مؤثر اقدامات کیے جائیں تاکہ مستقبل میں اس قسم کے واقعات کا سدباب کیا جا سکے۔

چوری کے شکار دکاندار اور دیگر تاجروں نے اپنی حفاظت اور مال کے تحفظ کے لیے مزید اقدامات اٹھانے پر بھی غور شروع کر دیا ہے۔ علاقے کے عوام اس سنگین واقعے پر شدید غم و غصے کا اظہار کر رہے ہیں۔